शिवप्रहार न्यूज - घरातील बाईमाणसाकडे वाईट नजरेने का पाहतो?असे विचारणाऱ्याला छावाच्या पदाधिकाऱ्याकडुन मारहाण; श्रीरामपुरात ३०७ चा गुन्हा दाखल…

घरातील बाईमाणसाकडे वाईट नजरेने का पाहतो?असे विचारणाऱ्याला छावाच्या पदाधिकाऱ्याकडुन मारहाण; श्रीरामपुरात ३०७ चा गुन्हा दाखल…

श्रीरामपूर(शिवप्रहार न्युज)- घरातील बाई माणसाकडे वाईट नजरेने का पाहतो असे विचारल्याच्या रागातून छावा ब्रिगेडच्या अध्यक्षाने एकाच्या खुनाचा प्रयत्न केल्याची घटना चितळी गावात घडली आहे.

     याबाबत अधिक माहिती अशी की, दीपक राजेंद्र शिंदे वय-25, धंदा-लाईट फिटिंग, रा-फत्याबाद, ता.श्रीरामपूर हा घरी असताना त्याच्या आई व बहिणीने सांगितले की, तू घरी नसताना विश्वनाथ वाघ घरी येतो, घरासमोर चकरा मारतो. त्यानंतर दीपक शिंदे हा मावस भावाला घेऊन खात्री करण्यासाठी विश्वनाथ वाघ याच्याकडे चितळी येथे गेला. मराठी शाळेसमोर आपल्या महिंद्रा कार मध्ये बसलेल्या विश्वनाथ वाघला दीपक म्हणाला आमच्या घरी नेहमी चकरा का मारतो व माझ्या घरातील बाई माणसाकडे वाईट नजरेने का पाहतो? असे विचारले.

     तेव्हा वाघ म्हणाला गाडीमध्ये बस आपण बोलू असे म्हणून दीपकला गाडीत बसवून घेऊन शाळेच्या मैदानात आले. तेथे दीपकला गाडीखाली उतरवून विश्वनाथ वाघ याने गाडीतून हॉकी स्टिक घेऊन दीपकला शिवीगाळ करून तुला मी आत्तापर्यंत सहकार्य केले, तुझा मुडदा पाडतो असे म्हणत हॉकी स्टिकने दीपकच्या डोक्यावर मारत असताना दीपकने डावा हात मध्ये घेतला.तेव्हा त्याच्या कोपरावर मार लागला. यावेळी दीपक मोठ्याने ओरडल्याने तेथे त्याचा मावस भाऊ अमोल थोरात आला तेव्हा विश्वनाथ वाघ त्याची कार सोडून अंधारात पळून गेला.

      याप्रकरणी दीपक शिंदे याने फिर्याद दिल्यावरून आरोपी विश्वनाथ पांडुरंग वाघ ,रा-चितळी, ता-राहता याच्याविरुद्ध श्रीरामपूर तालुका पोलिसांत भादवि कलम 307, 323, 504, 506 प्रमाणे गुन्हा दाखल करण्यात आला आहे. याप्रकरणी पुढील तपास पोनि. ज्ञानेश्वर थोरात हे करीत आहेत.