शिवप्रहार न्यूज- दुर्दैवी अपघातात 3 युवक ठार; एक गंभीर जखमी
Editor Chandu Aage 
दुर्दैवी अपघातात 3 युवक ठार; एक गंभीर जखमी
संगमनेर(शिवप्रहार न्युज)- दुधाचा टँकर आणि दोन दुचाकी वाहने यांचा अपघात होऊन दुचाकीवरील 3 तरूणांचा दुर्दैवी मृत्यू झाला असून एक तरुण गंभीर जखमी झाला आहे.
हा दुर्दैवी अपघात काल शुक्रवारी (दि.17) रात्री 8:30 च्या सुमारास संगमनेर तालुक्यातील संगमनेर-अकोले रस्त्यावर मंगळापुर शिवारात घडला आहे.
या दुर्दैवी अपघातात ऋषिकेश उमाजी हासे ( वय २०), निलेश बाळासाहेब सिनारे (वय २६), सुयोग बाळासाहेब हासे (वय २०) यांचा मृत्यू झाला तर संदीप भाऊसाहेब केरे ( वय ३२) हा गंभीर जखमी झाला आहे.
याबाबत संगमनेर शहर पोलिसांनी दिलेली माहिती अशी की, दुधाचे संकलन करून अकोलेकडून टँकर येत होता. त्यावेळी दोन दुचाकीहून चार जण अकोलेच्या दिशेने जात होते. यावेळी या तीन वाहनांचा अपघात झाला.
अपघाताची माहिती मिळताच संगमनेर शहर पोलीस ठाण्यातील सहाय्यक पोलीस निरीक्षक राजेंद्र पवार, पोलिस नाईक विजय खाडे, निलेश धादवड, विजय पवार हे तात्काळ अपघातस्थळी पोहोचले. रुग्णवाहिकेतून अपघातग्रस्तांना रुग्णालयात आणण्यात आले. डॉक्टरांनी तिघांचा मृत्यू झाल्याचे घोषित केले. केरे यांच्यावर शहरातील एका खासगी रुग्णालय उपचार सुरू आहेत. अपघातग्रस्त वाहने पोलिसांनी ताब्यात घेतली आहे.
