शिवप्रहार न्युज - कारच्या धडकेत एकाचा मृत्यू तर एक जखमी; कारचालक फरार...

कारच्या धडकेत एकाचा मृत्यू तर एक जखमी; कारचालक फरार...

श्रीरामपूर (शिवप्रहार न्युज)- अशोकनगर फाट्याजवळ रविवारी रात्री दुचाकी व कारचा अपघात होऊन दुचाकीवरील सुतगिरणीजवळील सम्राटनगर येथील तरूणाचा उपचारादरम्यान मृत्यू झाला तर दुसरा जखमी झाला. तसेच काल सोमवार दि. 29 रोजी दुपारी झालेल्या अपघातात एक मुलगी जखमी झाली. फाट्यावर गतिरोधक नसल्याने अपघात सुरुच आहे. रविवार दि. 28 रोजी रात्री साडेनऊ वाजेच्या सुमारास अशोकनगर फाटा येथे बांधकाम कामगार दुचाकीवरुन श्रीरामपूरच्या दिशेने घरी जात असताना श्रीरामपूरकडून येणार्‍या चारचाकी वाहनाने दुचाकीला समोरून जोराची धडक दिली. रस्त्यावर झालेल्या जोरात आवाजामुळे परिसरातील नागरिकांनी अपघातस्थळी धाव घेतली. यावेळी श्रीरामपूर येथील बांधकाम कामगार तसेच सोबत असलेला एक व्यक्ती जखमी झाल्याचे दिसले. नागरिकांनी घटनेची माहिती श्रीरामपूर शहर पोलीसांना कळविली तसेच रुग्णवाहिकेस पाचारण करून अपघातातील जखमी तरुणांना वैद्यकीय उपचारासाठी श्रीरामपूर येथील साखर कामगार रुग्णालयात हलविले. कैलास लक्ष्मण धनवटे (वय 45, रा. सम्राटनगर सूतगिरणी) व सागर परदेशी (वय 35, रा. सुतगिरणी, श्रीरामपूर) अशी त्यांची नावे असून उपचारादरम्यान कैलास लक्ष्मण धनवटे या तरुणाचा मृत्यू झाला आहे. अपघाताच्या घटनेनंतर चारचाकी वाहनचालक भरधाव वेगात फरार झाल्याची माहिती नागरिकांनी दिली. याबात शहर पोलीस ठाण्यात अपघाताचा गुन्हा दाखल करण्यात आला असून पुढील तपास श्रीरामपूर शहर पोलीस करीत आहे.