शिवप्रहार न्यूज -कमालपूरजवळ वाळू तस्कर टेम्पोची पोलीस गाडीला धडक,तालुका पोलीस बालंबाल बचावले;घटना CCTV मध्ये कैद…
Editor Chandu Aage कमालपूरजवळ वाळू तस्कर टेम्पोची पोलीस गाडीला धडक,तालुका पोलीस बालंबाल बचावले;घटना CCTV मध्ये कैद…
श्रीरामपूर - श्रीरामपूर तालुक्यातील कमालपुर या गोदावरी नदी काठच्या गावामध्ये आज रविवारी पेट्रोलिंग करणाऱ्या पोलीस वाहनाला वाळू तस्करी करणाऱ्या टेम्पो चालकाने धडक दिली.या घटनेत श्रीरामपूर तालुका पोलीस ठाण्याचे पोलीस निरीक्षक श्री.मधुकर साळवे यांच्यासह गाडीत बसलेले कर्मचारी बालंबाल बचावले.
याबाबत अधिक माहिती अशी की,अशोक कारखाना निवडणुकीनिमित्त पोलीस प्रशासन व महसूल प्रशासन यांनी चोख बंदोबस्त लावला होता. या बंदोबस्ताच्या अनुषंगाने तालुका पोलीस ठाण्याचे पोलीस निरीक्षक श्री.साळवे हे कमालपूर गावात पेट्रोलिंग करत असताना त्यांना एक पिवळ्या रंगाचा विना नंबर टेम्पो कमालपूर रस्त्यावरून जाताना दिसला. त्यावेळी पोलीस निरीक्षक श्री.साळवे यांनी टेम्पोवाल्या वाळू तस्कराला थांबण्यास सांगितले. परंतु तो थांबला नाही. म्हणून पोलीस निरीक्षक श्री.साळवे यांनी धाडस दाखवत पोलीस वाहनातून या वाळू तस्कर टेम्पोचा एक किलोमीटरपर्यंत कमालपुर रोडने पाठलाग केला.या पाठलागा दरम्यान टेम्पो चालकाने पोलिसांच्या गाडीला धडक दिली व पुढे जाऊन टेम्पो सोडून तो पळून गेला.
श्रीरामपूर तालुका पोलीस ठाण्यात हा टेम्पो जप्त करण्यात आला असून फरार वाळूतस्कराविरोधात गुन्हा दाखल करण्यात आला आहे.श्रीरामपूरचे डीवायएसपी श्री. संदीप मिटके व पोलीस निरीक्षक श्री.मधुकर साळवे यांच्या मार्गदर्शनाखाली तालुका पोलीस या वाळू तस्कर आरोपीचा कसून शोध घेत आहे.
