शिवप्रहार न्युज - श्रीरामपूरच्या महिलेला चाकू लावून सोन्याची पोत लुटली ...
Editor Chandu Aage 
श्रीरामपूरच्या महिलेला चाकू लावून सोन्याची पोत लुटली ...
श्रीरामपूर/राहुरी (प्रतिनिधी) – राहुरी बस स्थानकात एक महिला बसमध्ये चढत असताना दोन भामट्या महिलांनी तिचे हात धरले. तर अजुन एका भामट्याने महिलेच्या गळ्याला चाकू लावून गळ्यातील एक तोळ्याची सोन्याची पोत काढून घेतल्याची घटना घडली आहे. हिराबाई म्हसू कल्हापुरे (वय ६०) रा. उंबरगाव, ता. श्रीरामपूर या नांदगाव शिंगवे येथे कामानिमित्त गेल्या होत्या. दुपारच्या दरम्यान त्या श्रीरामपूरकडे परत जाण्यासाठी राहुरी बसस्थानक येथे थांबल्या असता काही वेळात नगर-श्रीरामपूर बस आली.
हिराबाई कल्हापुरे या बसमध्ये चढत असताना अनोळखी दोन महिलांनी त्यांचे हात धरले तर एका भामट्या पुरुषाने हिराबाई कल्हापुरे यांच्या गळ्याला चाकू लावून एक तोळा वजनाची सोन्याची पोत जबरदस्तीने काढून घेतली. त्यानंतर सदर भामटा व महिला तेथून पसार झाल्या. हिराबाई कल्हापुरे यांनी आरडाओरड केली, परंतु भामटे तोपर्यंत पसार झाले होते.
घटनेनंतर हिराबाई म्हसू कल्हापुरे यांनी राहुरी पोलीस ठाण्यात धाव घेऊन फिर्याद दिली. त्यांच्या फिर्यादीवरून त्या तीन आरोपींविरोधात भारतीय न्याय संहिता कलम ११२ (२), ३०७,३०९ (२), ३०९ (४) प्रमाणे गुन्हा दाखल करण्यात आला आहे.
