शिवप्रहार न्युज - आळंदीतील वेदोत्सव परिक्षेत बेलापूरचा महेश दायमा प्रथम...

आळंदीतील वेदोत्सव परिक्षेत बेलापूरचा महेश दायमा प्रथम...

   बेलापूर (प्रतिनिधी)- महर्षी वेदव्यास प्रतिष्ठान पुणे यांच्या वतीने आळंदी येथे पाच दिवसीय वेदोत्सव २०२५ संपन्न झाला या वेदोत्सव परीक्षेत दधीमती वैदिक गुरुकुल गोठमांगलोत गुरुकुलातील व बेलापूर येथील पत्रकार दिलीप दायमा यांचे चिरंजीव बटुक महेश दायमा यांनी प्रथम क्रमांक मिळवून सुवर्णमुद्रिका पटकावली.

   दरवर्षी प्रमाणे याही वर्षी महर्षी वेद व्यास प्रतिष्ठान पुणे यांच्यावतीने आळंदी येथे वेदोत्सव २०२५ संपन्न झाला. या वेदोत्सवात महर्षी वेदव्यास प्रतिष्ठानच्या सर्व ४० विद्यालयांमधून तीनशे विद्यार्थ्यांनी सहभाग घेतला होता. पाच दिवस चाललेल्या या स्पर्धेमध्ये सूर्यनमस्कार स्पर्धा, निबंध स्पर्धा, विविध गुणदर्शन स्पर्धा, वकृत्व स्पर्धा, संपूर्ण शुक्ल यजुर्वेद मध्यादिन संहिता या परीक्षा घेण्यात आल्या होत्या. या सर्व परीक्षेत दधीमती वैदिक गुरुकुल गोठमांगलोत या गुरुकुलातील बटुक महेश दिलीप दायमा यांनी प्रथम क्रमांक मिळविला. त्याला त्याबद्दल सुवर्णमुद्रिका तसेच चांदीचे पंचपात्र सेट देऊन त्याचा सन्मान प्रभू श्रीराम मंदिराचे कोषाध्यक्ष महंत गोविंद गिरीजी महाराज यांच्या हस्ते करण्यात आला. तसेच दधिमती गुरुकुलचे गुरुजी आचार्य वेदमूर्ती श्री कमलकिशोर जोशी याचाही सन्मान करण्यात आला. महेश दायमा हे पत्रकार दिलीप दायमा यांचे चिरंजीव आहेत. महेश दायमा यास दधिमती वैदिक गुरुकुल संस्थेचे अध्यक्ष सोहनलाल दायमा, सचिव हरिनारायण व्यास, कोषाध्यक्ष जय किशन संचालक समिती अध्यक्ष भालचंद्र व्यास, सहसचिव रूपनारायण असोपा, अध्यापक कमल किशोर जोशी तसेच सुभाष मिश्रा आदींचे मार्गदर्शन लाभले.