शिवप्रहार न्यूज-कोरोना संकटात श्रीरामपुरातील आयकॉन फाऊंडेशन  धावले रुग्णांच्या मदतीला...

कोरोना संकटात श्रीरामपुरातील आयकॉन फाऊंडेशन  धावले रुग्णांच्या मदतीला...

श्रीरामपूर -तालुक्यात कोरोनाची स्थिती दिवसागणिक वाढत चाललेली दिसत असुन दररोज होणार्या रुग्णवाढी मुळे रुग्णांचे हाल होत आहेत.स्थानिक प्रशासन व रुग्णालये यांच्याकडून सर्व प्रकारच्या सोयी उपलब्ध करून दिल्या जात आहेत. मात्र रुग्ण वाढीमुळे त्यात कुठेतरी कमतरता येणे साहजिक आहे. अशा या कमतरतेला भरुन काढण्यासाठी रुग्णांच्या व रुग्णांच्या नातेवाईकांच्या मदतीला श्रीरामपुरातील आयकॉन फाउंडेशन धावून आले आहे.
       श्रीरामपूर शहरातील आयकॉन फाउंडेशनच्या वतीने गेल्या काही काळापासून कोरोना रुग्णांना व त्यांच्या कुटुंबियांना जेवण पुरविण्याचे काम केले जाते आहे. विशेष म्हणजे हे जेवण पूर्णत: मोफत दिले जाते आहे. दुपारचे आणि रात्रीचे जेवण डिस्पोजेबल डब्यात भरून हे डबे रुग्णांना रुग्णालयात व गरज असल्यास रुग्णांच्या कुटुंबियांना त्यांच्या घरी जाऊन थेट दिले जाते. हे सर्व करत असताना सोशल डिस्टन्सचे काटेकोर पालन व सुरक्षेची पूर्ण काळजी आयकॅान फाउंडेशनच्या वतीने घेतली जात आहे.
श्रीरामपुरातील आयकॉन फाउंडेशनच्या या समाजहितकारक कामाबद्दल त्यांचे सर्व स्तरातून कौतुक होत असून , सामाजिक कार्यकर्ते व नागरिकांकडून त्यांना मदत देखील केली जात आहे. आयकॉन फाउंडेशनच्या माध्यमातून श्री. विशाल पवार, प्रसाद देशमुख, दत्तात्रय पाठारे, राजेश मोरे यांच्यासह अनेक तरुण आपले योगदान देत आहेत.