शिवप्रहार न्युज - श्रीरामपूर MIDC मध्ये चोऱ्या; तीव्र आंदोलनाचा इशारा...
Editor Chandu Aage 
श्रीरामपूर MIDC मध्ये चोऱ्या; तीव्र आंदोलनाचा इशारा...
श्रीरामपूर (शिवप्रहार न्युज)- श्रीरामपूर एमआयडीसीत चोरट्यांनी धुमाकूळ घालून रोकड चोरुन नेण्याचा प्रकार काल शुक्रवारी सकाळी उघडकीस आला. एमआयडीसीमध्ये चोरट्यांनी सुर्योदय पॉलिफर्म कारखाना, करण बॉटलींग कंपनी, ओमसाई पॅकेजिंग कंपनी या कंपन्यांच्या ऑफिसचे दरवाजे तोडून जवळपास पावने दोन लाखांची रोकड चोरुन नेली आहे. चोरट्यांनी कंपन्यांच्या सीसीटीव्हीची तोडफोड केली. चोरट्यांनी रात्रीच्यावेळी चोरीसाठी वापरलेल्या बॅटऱ्या त्यांनी तेथेच सोडून दिल्या होत्या. या प्रकरणी सुर्योदय पॉलिफर्मचे प्रकाश सतवदास चुग यांनी श्रीरामपूर शहर पोलिसात फिर्याद दिल्यावरुन अज्ञात चोरट्यांविरुद्ध गुन्हा दाखल करण्यात आला आहे.
दरम्यान श्रीरामपूर एमआयडीसीत गेल्या काही महिन्यांपासून मोठ्या प्रमाणावर चोऱ्या होत असून पोलिसांकडून मात्र या चोऱ्यांचा तपास लागत नसल्याने उद्योजकांनी आज तीव्र आंदोलनाचा इशारा देत आज सकाळी पोलिसांना निवेदन दिले. यावेळी उद्योजक, व्यापारी मोठ्या संख्येने उपस्थित होते.
