शिवप्रहार न्यूज- दुधामध्ये “पावर ऑइल” ची भेसळ करणारा दुध डेअरी वाला राजेंद्र जरे याला राहुरी पोलिसांनी पकडले

दुधामध्ये “पावर ऑइल” ची भेसळ करणारा दुध डेअरी वाला राजेंद्र जरे याला राहुरी पोलिसांनी पकडले...

राहुरी -एकीकडे सध्या राज्यभर लॅाकडाऊन चालू असून दुधाची मागणी प्रचंड कमी झालेली आहे.तसेच हॉटेल व्यवसाय, चहाची दुकाने,मिठाईची दुकाने,कॅन्टीन हे बंद असल्यामुळे दुधाची मागणी घटून दूध साठा शिल्लक राहत असल्याचे दिसत आहे.
 दुसरीकडे राहुरीतील एका बड्या दूध भेसळ वाल्यावर राहुरी पोलिसांनी धडक कारवाई केली आहे.
           याबाबतची हकीकत अशी की,राहुरी तालुक्यातल्या चंडकापूर ,पोस्ट- केंदळ,तालुका राहुरी या गावातील आरोपी राजेंद्र चांगदेव जरे ,वय 31 वर्षे, राहणार- चंडकापूर,पोस्ट केंदळ, ता.राहुरी याने गाईच्या दुधात “ लाईट लिक्विड पॅराफीन हे पावर ॲाईल व व्हे पावडर “ असे भेसळ पदार्थ मिसळून मनुष्यास खाण्यास असुरक्षित आणि मनुष्याच्या जीवितास धोकेदायक असे दूध तयार करून त्याची विक्री केली आणि मानवी जीवितास हानी पोचवली म्हणून फिर्यादी प्रदीप कुटे,अन्न सुरक्षा अधिकारी, अन्न व औषध प्रशासन विभाग,नगर यांच्या फिर्यादीवरून राहुरी पोलीस ठाण्यात गुन्हा रजिस्टर नंबर 340 /2021 भादंवि कलम 328 ,273 व अन्नसुरक्षा मानके कायदा चे कलम 26  आणि इतर कलमान्वये गुन्हा दाखल करण्यात आला आहे.
                 दुध भेसळीचा हा प्रकार अतिशय गंभीर स्वरूपाचा आणि समाजाच्या  आरोग्यासाठी घातक असल्याने या गुन्ह्याचा तपास राहुरी पोलीस स्टेशनचे पोलीस निरीक्षक श्री. दुधाळ हे स्वतः कटाक्षाने करीत आहेत.            
              या दुध भेसळीत आरोपी राजेंद्र  जरे याचे अन्य कोणी साथीदार आहेत का ? आरोपी जरे याने कोठेकोठे असे भेसळयुक्त दूध वितरित केले व विकले ?आरोपी हा भेसळीचे ॲाईल व पावडर कुठून आणत होता?  अशा सगळ्या प्रश्नांचे उत्तर पोलीस तपासात  मिळु शकते. तसेच यामध्ये कोणा-कोणाचा हात आहे ;कोणी मोठे मासे या प्रकरणी गळाला लागुन श्रीरामपूरात जशी काही वर्षांपूर्वी दूध भेसळ उघड झाली होती तशी दुध भेसळ वाल्यांची मोठी साखळी राहुरी तालुक्यात उघड होणार का हे आता लवकरच स्पष्ट होणार आहे. 
           तरी अशा मानवी जीविताशी खेळणाऱ्या समाज घातक प्रवृत्ती विरोधात अतिशय कठोरात कठोर कारवाई करावी अशी समाजातून मागणी होत आहे. हे भेसळयुक्त दुध सर्वसामान्यांची पोरं-बाळं पितात त्यामुळे त्या निष्पाप जिवांच्या आरोग्याला दूध भेसळखोरांमुळे मोठा धोका निर्माण झाला असल्याने प्रसंगी अशा दूध भेसळवाल्यांना भर चौकात फासावर लटकवावे असे परखड मत यावेळी शिवप्रहार प्रतिष्ठान या संघटने कडुन व्यक्त करण्यात आले आहे.