शिवप्रहार न्यूज - श्रीरामपुरात अपघातात तरूण ठार; व्यापारी गंभीर जखमी...

श्रीरामपुरात अपघातात तरूण ठार; व्यापारी गंभीर जखमी...

श्रीरामपूर (शिवप्रहार न्युज) -श्रीरामपूर शहरालगत नेवासारोडवर असणाऱ्या ओव्हरब्रिज जवळ मोटारसायकल आणि स्कुटीची भीषण समोरसमोर टक्कर होवून त्यात मातापूर येथील मोटारसायकलस्वार तरूण ठार झाला असून स्कुटीवरील श्रीरामपूरचा व्यापारी गंभीर जखमी झाला आहे. आज सोमवारी सकाळी ९.३० ला घडलेल्या या अपघातात दोन्ही गाड्यांचा अक्षरशः भूगा झाला आहे. या अपघातात मनोज नानासाहेब उंडे, वय-२३, रा. मातापूर, ता. श्रीरामपूर या तरूणाचा दुर्दैवी मृत्यू झाला आहे तर स्वस्तीक प्रेसचे मालक पारस कल्याणमल पाटणी, वय-५२ हे गंभीर जखमी झाले असून त्यांच्यावर नगर येथे उपचार सुरू आहेत.

   याबाबत समजलेली अधिक माहिती अशी की, मनोज उंडे हा तरूण श्रीरामपूर बाजार समितीत नोकरीला असून कांदा लिलावाच्या ठिकाणी क्लार्क म्हणून काम करतो. आज सकाळी मोटारसायकलवरून मनोज हा अशोकनगरहून श्रीरामपूरकडे येत होता. त्याचवेळी श्रीरामपूरकडून ओव्हरब्रिजच्या दिशेने पारस पाटणी हे आपल्या प्रेसच्या कामासाठी चालले होते. पारस पाटणी हे ओव्हरब्रिजच्या जवळ गेल्यानंतर त्यांना उजव्या बाजूला समोरील दुकानात जायचे होते. म्हणून त्यांनी गाडी त्या दिशेने वळवली मात्र, त्याचवेळी मनोज उंडे हा तरूण मोटारसायकलने ओव्हरब्रिजवरून खाली उतरत होता. काही कळायच्या आत दोन्ही मोटारसायकल एकमेकांवर समोरासमोर इतक्या जोरात धडकल्या की, दोन्ही मोटारसायकलचा भूगा होवून अक्षरशः दोन्ही मोटारसायकल या एकमेकांत गुंतल्या होत्या. यावेळी मनोज उंडे याला जबर मार लागल्याने तो जागीच जागीच ठार झाला तर पारस पाटणी यांचा पाय फ्रॅक्चर झाला असून डोक्याला गंभीर इजा झाल्याने रक्तस्त्राव होत होता. त्यामुळे श्रीरामपूर येथील कामगार रुग्णालयात त्यांना दाखल केले असता पुढील उपचारासाठी डॉ.रविंद्र जगधने यांनी नगर येथे हलविण्याचा सल्ला दिला. त्यानुसार नगर येथे पाटणी यांच्यावर उपचार सुरू आहेत. अचानकपणे घडलेल्या या भीषण अपघातामुळे अपघातस्थळी मोठी गर्दी जमली होती. मातापूर येथील तरूणाचा या अपघातात दुर्दैवी मृत्यू झाल्याने हळहळ व्यक्त करण्यात येत असून पारस पाटणी यांचीही प्रकृती गंभीर असल्याने व्यापारी वर्गातून चिंता व्यक्त करण्यात येत आहे.