शिवप्रहार न्युज - शिर्डीत जावयाकडून पत्नीसह तिघांचे खून; श्रीरामपुरात एकलहरेत दरोड्यात एकाचा खून...

शिर्डीत जावयाकडून पत्नीसह तिघांचे खून; श्रीरामपुरात एकलहरेत दरोड्यात एकाचा खून...

   श्रीरामपूर/शिर्डी (शिवप्रहार न्युज)- काल बुधवारची रात्र चार खुनाच्या प्रकाराने काळरात्र ठरली असून पोलीस यंत्रनाही गडबडून गेली आहे.

   शिर्डी येथे कौटुंबिक कारणातून संतप्त जावई सुरेश विलास निकम व त्याचा चुलत भाऊ रोशन कैलास निकम या दोघांनी सुरेशची आजेसासू हिराबाई द्रुपद गायकवाड तसेच मेहुणा रोहित चांगदेव गायकवाड तसेच बायको वर्षा सुरेश गायकवाड यांना धारदार चाकूने भोसकून खून केला. या प्रकरणाची माहिती मिळताच एसपी.राकेश ओला, अप्पर पोलीस अधीक्षक स्वाती भोर, डीवायएसपी मिटके यांनी तातडीने घटनास्थळी भेट दिली. पोलिसांनी वेगाने तपासाची चक्र फिरवत आरोपी सुरेश विलास निकम व रोशन कैलास निकम यांना ताब्यात घेतले आहे. खुनाचा गुन्हा दाखल करण्याचे काम सुरू असून नेमका खून कोणत्या कारणाने करण्यात आला याचा तपास पोलीस करत आहेत.

    दरम्यान दुसऱ्या घटनेत श्रीरामपूर तालुक्यातील एकलहरे परिसरात राहणाऱ्या नईम रशीद पठाण यांच्या घरावर दरोडा टाकून तरुणाचा खून करण्यात आल्याचे समजते आहे. नईम पठाणला दरोडेखोरांनी साडीने गळफास देवून खून केल्याचे दिसत आहे. घटनास्थळी अप्पर पोलीस अधीक्षक स्वाती भोर यांच्यासह डिवायएसपी बसवराज शिवपुजे, पो.नि.गवळी, स्थानिक गुन्हे शाखेचे पोनि.आहेर आणि त्यांच्या पथकाने भेट दिली. त्यानंतर तातडीने एसपी.राकेश ओला हेही घटनास्थळी पोहोचले. पठाण याने नुकतेच जागेच्या व्यवहारासाठी एका पतसंस्थेतून लाखो रुपये काढून आपल्या घरात ठेवले होते असे समजते. सकाळी पोलीस घटनास्थळी बारकाईने पंचनामा करून तपास करत आहेत.

   दरम्यान शिर्डी व श्रीरामपुरात बुधवारी रात्री व पहाटे चार खुनाचे प्रकार घडल्याने समाजामध्ये क्रूरता किती वाढली आहे हे या घटनेतून स्पष्ट होत आहे.