शिवप्रहार न्युज - श्रीरामपुरातील दोन विद्यार्थिनींना पळविल्याने खळबळ... 

श्रीरामपुरातील दोन विद्यार्थिनींना पळविल्याने खळबळ... 

   श्रीरामपूर (शिवप्रहार न्यूज)- श्रीरामपूर शहरात कॉलेज परिसर व शिरसगाव परिसर या भागातून दोन सोळा वर्षाच्या अल्पवयीन विद्यार्थिनींना अज्ञात आरोपीने पळून नेण्याचा प्रकार घडला असून या घटनेने पालक वर्गात खळबळ उडाली आहे. ज्या मुली पळवून नेण्यात आल्या त्यांचे पालक नातेवाईक तसेच पोलीसही मुलीचा व आरोपींचा कसून शोध घेत आहे. 

   याबाबत अधिक माहिती अशी की, श्रीरामपूर शहर परिसरात एका कॉलेजमध्ये शिक्षण घेणाऱ्या सोळा वर्षाच्या विद्यार्थिनीला सकाळी साडेआठच्या सुमारास विद्यार्थिनीच्या वस्तीगृहातून अज्ञात आरोपींनी पळून नेले. धक्कादायक बाब म्हणजे या ठिकाणी सुरक्षा व्यवस्था असतांना ही या विद्यार्थिनीला पळवून नेण्यात आले. या प्रकरणी विद्यार्थीनीच्या नातेवाईकांनी श्रीरामपूर शहर पोलिसांत तक्रार दिल्यावरून अज्ञात आरोपी विरुद्ध भादवि कलम 363 प्रमाणे गुन्हा दाखल झाला आहे.

    दुसऱ्या घटनेत शिरसगाव परिसरातील सोळा वर्षाच्या अल्पवयीन मुलीला अज्ञात आरोपीने रात्री दहाच्या सुमारास काहीतरी आमिष दाखवून पळून नेले. याप्रकरणी मुलीच्या नातेवाईकांनी शहर पोलिसात तक्रार दिल्यावरून अज्ञात आरोपी विरुद्ध अपहरणाचा गुन्हा दाखल करण्यात आला आहे. 

   याप्रकरणी पुढील तपास पोलीस निरीक्षक देशमुख यांच्या मार्गदर्शनाखाली पोसई.मगरे करत असून पोलीस पथक विद्यार्थिनींचा व आरोपींचा कसून शोध घेत आहे. या मुलींसंबंधी कोणाला काही माहिती असल्यास त्यांनी शहर पोलीस स्टेशनला माहिती सांगावी असे सांगण्यात येत आहे.