शिवप्रहार न्युज - 'त्या' अपघातात बहिणीला सोडवून परतणाऱ्या भावाचा दुर्दैवी मृत्यू...

'त्या' अपघातात बहिणीला सोडवून परतणाऱ्या भावाचा दुर्दैवी मृत्यू...

   श्रीरामपूर (शिवप्रहार न्युज)- तालुक्यातील भोकर येथून बहीणीला नाशिक येथे सोडवून परतणाऱ्या भोकर येथील दोघा भावांच्या कारला वडाळा महादेव शिवारात मध्यरात्री अपघात झाला. या कार अपघातात सागर खेत्री या तरूणाचा मृत्यू झाला. तर आकाश खेत्री हा गंभीर जखमी झाला. मयतावर शोकाकूल वातावरणात अंत्यसंस्कार करण्यात आले. गंभीर जखमीवर लोणी येथील प्रवरा मेडीकल येथे उपचार सुरू आहेत.

    भोकर येथे वेल्डींग व्यवसाय करणारे बाबासाहेब खेत्री यांचा मुलगा आकाश बाबासाहेब खेत्री (वय 28) व त्याचा चुलत भाऊ सागर लक्ष्मण खेत्री (वय 28) हे दोघे भाऊबीज सणासाठी आलेल्या बहिणीला आपली हुंडाई कार (नं.एमएच 14 एल बी 5854) हिने नाशिक येथे सोडविण्यासाठी गेले होते. तेथे बहीणीला पोहच करून घरी भोकर येथे परत येत असताना, सोमवारी रात्री अकरा वाजेच्या सुमारास श्रीरामपूर- नेवासा महामार्गावर वडाळामहादेव शिवारात त्यांच्या कारला भीषण अपघात झाला.

       या अपघातात सागर लक्ष्मण खेत्री या तरूणाच्या डोक्याला जबर मार लागल्याने त्याचा जागीच मृत्यू झाला. तर कार चालक आकाश खेत्री याच्या कमरेला, मानेला व डोक्याला जबर मार लागल्याने तो गंभीर जखमी झाला. या अपघातात कारचे मोठ्या प्रमाणात नुकसान झाले. वडाळा महादेव शिवारात राज्यमार्गालगतच्या झाडांना तोडून दुसर्‍या झाडात त्यांची कार गुंतलेली होती.

     अपघातातील मयत सागर याचा सहा महिन्यापुर्वीच विवाह झालेला होता.त्याच्या अपघाती निधनाने परीसरात हळहळ व्यक्त केली जात आहे. या प्रकरणी शहर पोलीसांत अपघाताची नोंद करण्यात आली असून पुढील तपास पोलीस निरीक्षक नितीन देशमुख यांच्या मार्गदर्शनाखाली हेड कॉन्स्टेबल संतोष परदेशी हे करत आहेत.