शिवप्रहार न्युज - देवगड येथे श्रीदत्त जयंती महोत्सवाची जय्यत तयारी…
Editor Chandu Aage 
देवगड येथे श्रीदत्त जयंती महोत्सवाची जय्यत तयारी…
नेवासा(प्रतिनिधी)राज्यातील एक जागृत गुरुदेव दत्तपीठ व भू-लोकीचा स्वर्ग अशी ओळख असलेल्या नेवासा तालुक्यातील तीर्थक्षेत्र देवगड येथे रविवार दि.८ डिसेंबर ते रविवार दि.१५ डिसेंबर या कालावधीत होणाऱ्या श्री दत्त जयंती महोत्सव व त्यानिमित्ताने आयोजित श्री दत्त याग नाम यज्ञ सप्ताह सोहळयाची जय्यत तयारी सुरू आहे. शनिवार दि.१४ डिसेंबर रोजी सायंकाळी ६ वाजता श्री दत्तजन्माचा मुख्य सोहळा हा संत महंतांसह हजारो भाविकांच्या उपस्थितीत साजरा होणार आहे.
श्री दत्तजयंती सोहळयाच्या निमित्ताने तीर्थक्षेत्र देवगड येथे अखंड हरिनाम सप्ताह त्यानिमित्ताने कीर्तन महोत्सव कार्यक्रमाचे आयोजन श्री समर्थ सदगुरू किसनगिरीजी बाबा यांच्या कृपा आशीर्वादाने व गुरुदेव दत्त पिठाचे प्रमुख गुरुवर्य महंत राष्ट्रीय संत श्रद्धेय श्री भास्करगिरीजी महाराज यांच्या मार्गदर्शनाखाली व उत्तराधिकारी स्वामी प्रकाशानंदगिरीजी महाराज यांच्या नेतृत्वाखाली करण्यात आले आहे.
श्री दत्त जयंती महोत्सवाचा शुभारंभ रविवारी दि.०८ डिसेंबर पासून होत आहे.या सोहळयात पहाटे ४ ते ४.३० मंगल सनई चौघडा वादन,४.३० ते ६.३० काकडा भजन,श्रींची प्रात:आरती, सकाळी ६.३० ते ७.३० दर्शन प्रदक्षिणा,७.३० ते ८.३० गीतापाठ,विष्णू सहस्त्रनाम, सकाळी ९ ते ११ ग्रंथराज ज्ञानेश्वरीचे सामूहिक पारायण,११.३० ते १ भोजन, दुपारी १ ते ३ समयानुसार आलेल्या गुणवंतांचे कार्यक्रम, दुपारी ३ ते ५ सामुदायिक ज्ञानेश्वरी पारायण, सायंकाळी ५ ते ७ हरिपाठ, श्रींची सायंम आरती व दर्शन,रात्री ७ ते ८ भोजन,तर रात्री ८.३० ते १०.३० यावेळेत होणाऱ्या कीर्तन महोत्सव होणार आहे.
रात्री ८.३० ते १०.३० यावेळेत होणाऱ्या किर्तन महोत्सवात शनिवार दि.८ डिसेंबर रोजी गोकुळजळगाव येथील हभप गंगाराम महाराज राऊत,रविवार दि.९ डिसेंबर रोजी पिंपरखेडा येथील हभप विठ्ठल महाराज शास्त्री चनघटे, सोमवार दि.१० डिसेंबर रोजी आळंदी येथील हभप चंदिले नाना महाराज,मंगळवार दि.११ डिसेंबर रोजी नेवासा येथील संत ज्ञानेश्वर महाराज मंदिर संस्थानचे महंत वेदांताचार्य हभप देविदास महाराज म्हस्के,गुरुवार दि.१२ डिसेंबर रोजी आळंदी येथील हभप उमेश महाराज दशरथे,शुक्रवार दि.१३ डिसेंबर रोजी भागवताचार्य हभप केशव महाराज उखळीकर,शनिवार दि.१४ डिसेंबर रोजी देवगड संस्थानचे उत्तराधिकारी स्वामी प्रकाशानंदगिरीजी महाराज यांच्या कीर्तनाचे
कार्यक्रम होणार आहे.
शनिवारी दि.१४ डिसेंबर रोजी सायंकाळी ६ वाजता श्रींना तोफांची सलामी देऊन गुरुवर्य श्री भास्करगिरीजी महाराज यांच्यासह संत महंतांच्या प्रमुख उपस्थितीत श्री दत्त जन्म सोहळा साजरा होणार आहे. तर रविवारी दि.१५ डिसेंबर रोजी देवगड संस्थानचे प्रमुख महंत गुरुवर्य श्री भास्करगिरीजी महाराज यांच्या सकाळी ८ ते १० यावेळेत होणाऱ्या काल्याच्या किर्तनाने आठ दिवस चालणाऱ्या श्री दत्त जयंती महोत्सव सोहळयाची सांगता होणार आहे.
श्री दत्त जन्म सोहळयाच्या निमित्ताने होणाऱ्या दत्त नाम यज्ञ सप्ताहात आयोजित ज्ञानेश्वरी पारायणासह रात्री होणाऱ्या नामवंत किर्तनकारांच्या कीर्तन महोत्सवातील कीर्तन श्रवणाचा भाविकांनी लाभ घ्यावा असे आवाहन श्री दत्त मंदिर संस्थान श्री क्षेत्र देवगड यांच्या वतीने करण्यात आले आहे.
