शिवप्रहार न्युज - श्रीरामपुरात चिकुचे पैसे मागितल्याने शेतकऱ्यासह व्यापाऱ्याला मारहाण...

श्रीरामपुरात चिकुचे पैसे मागितल्याने शेतकऱ्यासह व्यापाऱ्याला मारहाण...

   श्रीरामपूर (शिवप्रहार न्युज) - शेतकऱ्याने व्यापाऱ्याकडे मागील वर्षाच्या चिकुचे पैसे मागितल्याच्या कारणावरुन शेतकऱ्यासह त्याच्या बरोबरच्या फळ व्यापाऱ्याला मारहाण केल्याचा प्रकार शहरातील नेवासा रोडवरील आडत गोडावून येथे घडला आहे.

   याबाबत अधिक माहिती अशी की, श्रीरामपूर तालुक्यातील भोकर येथील शेतकरी सतिष सुर्यभान शेळके हे शनिवारी रात्री साडेआठच्या दरम्यान त्यांच्याकडील चिक्कु विकण्यासाठी आडत गोडावून येथील व्यापारी जमील याकूब बागवान यांच्याकडे आले होते. तेव्हा तेथे शेतकरी शेळके यांना मागील वर्षी त्यांच्याकडील चिक्कु खरेदी केलेला व्यापारी शकील इस्माईल सय्यद हा भेटला तेव्हा शेळके यांनी मागील वर्षीचे बाकी राहिलेले पैसे मागितले तेव्हा सय्यद हा तेथून निघून गेला. त्यानंतर थोड्यावेळाने शकील सय्यद याने अल्ल उर्फ अलताफ सय्यद तसेच दहा ते बारा अनोळखींना घेवून तेथे आला आणि शेळके यांना काठ्यांनी तसेच लाथाबुक्यांनी मारहाण केली. यावेळी व्यापारी जमीर बागवान हे शेतकरी शेळके यांना वाचविण्यासाठी गेले असता त्यांना देखील आरोपींनी काठ्यांनी व लाथाबुक्यांनी मारहाण केली. तसेच शेळके यांना तू आम्हाला पैसे कसाकाय मागतो असे म्हणत तू मार्केटला कसा येतो, ते बघतो अशी धमकी देवून शिवीगाळ केली. 

   याप्रकरणी शेतकरी सतिष शेळके यांनी श्रीरामपूर शहर पोलिसात फिर्याद दिल्यावरुन मारहाण करणारे आरोपी शकील इस्माईल सय्यद, अल्ल उर्फ अलताफ सय्यद, दोघे रा. शिरसगाव, ता. श्रीरामपूर यांच्यासह दहा ते बारा अनोळखी आरोपीविरुद्ध गुन्हा दाखल करण्यात आला असून या प्रकरणी पुढील तपास पोनि देशमुख यांच्या मार्गदर्शनाखाली श्रीरामपूर शहर पोलीस करत आहेत.